Сұрақ: «Құдайдан қорық» деп не үшін айтады?
Жауап: Халық арасында «Құдайдан қорық» деген сөз жиі қолданады. Қорқу сөзі үрейлендіруді білдіргенімен, мақсаты Құдайды құрметтеуге бағытталған. Бұл сөздің жалпы мағынасы Құдай алдында жауапкершілікті сезіну, жаман іс жасаудан сақтану, әр жаман іс үшін жауап бар деп сезіну, Алла Тағаланы құрметтеу, оның бұйрықтарын дұрыс орындау, ар-ожданмен өмір сүруге ұмтылуды білдіреді. Яғни, Жаратушы алдындағы жауапкершілікті түсіндіріп, жамандықтан сақтандырып, әділ өмір сүруге талпыну және күнәдан сақтану мағынасында қолданады.
Ал, әдетте ниеті бұзық, Құдайдан қорқпайтын адамнан әртүрлі жамандық күтуге болатыны белгілі. Сондықтан қазақтың «Құдайдан қорық» деп Құдаймен қорқытқаны «жаман болма, биікпін деме, сенен үлкен Құдай бар, тәубеңе кел» дегені.
«Талақ» сүресінің 2-аятында: «Кімде-кім Аллаға тиісінше тағзым етсе және Оған қарсы келіп асы болудан сақтанса, Алла оған тығырықтан шығатын жол ашып береді» десе, Пайғамбарымыз (с.а.у.) хадисінде: «Алладан қай жерде болсаң да қорық! Жаман істің артынан оны өшіретін жақсы іс жаса, әрі адамдарға көркем мінезбен мәміле жаса!» деген.
Демек, Алладан жақсылықты үміт етіп, жаман амалдардан тыйылу саналы аманың ісі екен.
Икрам АЙТАЕВ
