АҚШ қарулы күштері Иран аумағына кезекті әуе соққыларын жасады. АҚШ Орталық қолбасшылығының (CENTCOM) мәліметінше, операция Тегеранның Ормуз бұғазында жүзіп бара жатқан M/V GFS Galaxy контейнерлік кемесіне жасаған шабуылына жауап ретінде жүзеге асырылған, деп хабарлайды Egemen.kz
Ведомствоның хабарлауынша, шабуыл кезінде кеме экипажының бір мүшесі із-түзсіз жоғалып, бортта өрт шыққан. Салдарынан кеме елеулі зақым алып, әрі қарай жүзу мүмкіндігінен айырылған.
CENTCOM бұл бір апта ішіндегі Иранға қарсы үшінші соққы екенін мәлімдеді. Бұған дейінгі шабуылдар да коммерциялық жүк кемелеріне жасалған шабуылдарға жауап ретінде жасалған.
Өз кезегінде Иран АҚШ-тың әрекетіне жауап ретінде 12 шілдеде (АҚШ-тың шығыс жағалауы уақыты бойынша 11 шілде) Бахрейн, Иордания, Кувейт, Катар және Оманда орналасқан америкалық әскери нысандарға зымырандар мен ұшқышсыз ұшу аппараттарын жібергенін хабарлады.
Ирандық Press TV телеарнасының мәліметінше, Кувейтте Patriot әуе қорғаныс кешендері, оқ-дәрі қоймасы және америкалық әскери радиолокациялық станция нысанаға алынған. Бахрейнде байланыс орталығы мен әскери радар, ал Катарда Әл-Удейд әуе базасы, жойғыш ұшақтарға қызмет көрсету орталығы және командалық пунктке соққы жасалғаны айтылды.
Сондай-ақ Иранның Ислам революциясы сақшылар корпусының мәліметінше, Омандағы Дукм портында АҚШ әскери-теңіз күштерінің логистикалық орталықтары мен әуе кемелерін жанармаймен қамтамасыз ету инфрақұрылымы шабуылға ұшыраған.
Бұған қоса, Иранның Ислам революциясы сақшылар корпусы АҚШ аймақтағы іс-қимылын тоқтатқанға дейін Ормуз бұғазының жабылғанын мәлімдеді.
