Сұрақ: Зиратты жаман шөптерден тазалауға бола ма?
Жауап: Мұсылманның міндетті діни рәсімдерінің бірі – марқұм болған кісіні жаназасын оқып, қабірге жерлеу. Марқұмның артында қалған кісілері жерленген қабірге барып, Құран оқып, дұға етуі шариғат құптаған амалдардан.
Еліміздің түрлі өңірінде марқұмдарды жерлеу орындары көбінесе қырқалы, белесті қырларға немесе биік әрі құрғақ жазық алқаптарға салынған. Таңдалған жерден мақсат – қыр жерлерде қар, су жиналмайтыны және т.б. себептері бар. Сондай-ақ, түрлі жануарлар кіріп кетпесін, аяқасты етпесін деген мақсатта мазараттарды қоршап қою Ислам қайтарған амал емес.
Қазақ халқында қабір басын таза ұстау – марқұмдардың рухына деген құрмет дәстүрі бар. Әдетте көктем айы келгенде әр ауыл тұрғындары қабірдің аумағын қоқыстан, қураған шөптерден тазартып, маңайын ретке келтіріп отырады.
Әр мұсылманға қабірді құрметтеу, таза ұстау, марқұмдарға дұға жасау, қураған шөптерден тазалау, құран оқу, дұға жасау міндет. Ал шөп тазалау деп, қабірді таптап, құрметсіздік жасауды шариғат құптамайды. Демек, жыл сайын марқұмдардың қабірін арам шөптерден тазалап, Құран бағыштап қайту қайырлы істерден екен.
Икрам АЙТАЕВ
