Осы жолы қажыға барғанда, ерекше бір көзге түскен көрініс – екі қасиетті мешіттің тазалықшылары болды. Бұл қызметке адамдар, негізінен Пәкістан, Бангладеш, Үндістан, Малазия мемлекеттерінен келеді екен. Қызметтеріне өте адал, кішіпейіл, істеріне тыңғылықты, жүргендері білінбей қызмет ететін жандар екеніне куә болдық.
Әлбетте, оларға еңбекақы төленері белгілі нәрсе, бірақ іштерінде сауап үшін келетіндері де болады деседі. Осыдан бірнеше жыл бұрын әлеуметтік желіде осындай тазалықшы адамның жанында бірнеше адамдар суретке түсіп: «Мына адамға садақа, сыйлық берейік десек, қалтасы жоқ. Қалталарын тігіп тастаған, өзі күле береді. Сұрасақ, бұл адам – Үндістанда төрт-бес үлкен дүкені бар, бай адам болып шықты. Жылына осы адам қос мешіттің басшылығына арыз жазып, бір ай Меккеде, бір ай Мәдинада тегін тазалық қызметін жасайды екен», деп жазған еді.
Хадистерде «Алла Елшісі, оған Алланың салауаты мен сәлемі болсын, сахабаларына айналасындағы жерлерге мешіттер салуды, оларды тазартуды және хош иісті күтім жасауды бұйырды», деп келген.(Тирмизи, Әбу Дәуіт)
Сондықтан, Алла үйін тазарту ең сауапты амал екені белгілі.
Керек десеңіз, Сауд мемлекеті патшасы өзін «Екі Харамның (қасиетті мешіт) қызметшісі» деп атайды және жыл сайын өз қолымен тазалық жасап тұрады.
Ал, енді біз осы амалды жасай аламыз ба?
Әлбетте, ауылыңыздағы не ықшам ауданыңыздағы мешітті тазаласаңыз, не болмаса тазалағыш заттар, иіс-сабын апарсаңыз, сол сауапты алуыңызға күмән жоқ.
Алла баршамызға сондай сауапты амалды көп жасауды нәсіп етсін!
Қуат ҚАБДОЛДА
