Сұрақ: Мешіттен айтылатын азан дауысына тыйым салуға бола ма?
Жауап: «Азан» сөзі хабар беру, білдіру деген мағыналарды береді. Діни тұрғыда мешіттерде парыз намаздарының уақыттарын білдіру үшін айтылатын сөздер.
Азан айтудың өзіндік тәртіптері мен әдептері бар. Елімізде үш мыңға жуық мешітте намаз уақыттары кіргенде азандар тұрақты айтылады. Қазіргі таңда қоғамда азанның дыбысы шамадан тыс болып, адамдардың тыныштығына әсер етсе, реттеу мәселесі көтеріліп шешімі дер кезінде табылып отырады.
Кейбір азаматтардың тарапынан айтылатын мүлде азан айтылмасын, дін қоғамнан жойылсын деген талаптар дұрыс емес. Ал, дыбыстың шамадан тыс қатты болмауы, түнгі уақытта тынығуға кедергі келтіруі, ауру, қарт немесе сәбилі адамдарға ауыр әсер етуі мүмкін деген мақсатта дыбыс деңгейі санитарлық нормаға сай болсын деу – қоғамдық тәртіп пен ортақ өмір ережесіне қатысты мәселе.
Қоғамда туындаған мәселелер және көршіге қолайсыздық туғызбау мақсатында мешіттердің сыртқы динамик көлемі реттеледі. Демек, мұндай мәселелер – азанға қарсы шығу емес, қоғамдық үйлесімді сақтау.
Икрам АЙТАЕВ
