Сұрақ: Мешітте жамағатпен намаз оқу парыз ба?
Жауап: Мешітте бөлінбей жамағатпен намаз оқу маңызды. Ханафи мәзһабында ер кісілерге бес уақыт парыз намаздарын жамағатпен оқу – бекітілген сүннет. Басқа мәзһабтарда парыз деңгейінде қарастырылған.
Мешітте жамағатпен намаз оқудағы мақсат –мұсылмандар бір-бірімен танысып, араларында жылы қарым-қатынас пен ынтымақ орнату. Мешіттегі діни тұрақтылықты сақтау баршаға міндет. Жалғыз оқығаннан жамағатпен оқыған намазда сауап көп. Жамағатпен оқылған намаздың сауабы жеке оқылған намаздан жиырма жеті есе артық. Демек шамасы келсе әрбір мұсылманға мешітте жамағатпен намаз оқу сауапты іс екен.
Ал, кейбір радикалды діни топтар имамнан оқшауланып, бөлек жамағат болып намаз оқулары бүлікке апарып соқтырады. Мұндай іс-әрекеттер мәзһаб ұстанбайтын діни ағымдарға тән. Бүлікке себепші болмай, имамға ұйып намаз оқыған абзал іс.
Пайғамбарымыздың (с.а.у.) хадисінде: «Жамағатпен оқыған намаздың сауабы жеке оқылған намаздан жиырма жеті есе артық», деген. Демек, мешіттің жамағаты болып, бірлікте, игі-шараларда жүру сауапты амалдардан екен.
Икрам АЙТАЕВ
