Сұрақ: Мал сойғанда қандай әдептерді білген дұрыс?
Жауап: Исламда Алла адал еткен мал түрі көп. Ол малды союда Ислам тағылымы үйреткен әдептер мен шарттар бар. Сол әдептерін сақтап, тазалықпен орындау маңызды болмақ.
Қазіргі таңда әлеуметтік желілерде малды түрлі әдістермен өлтіріп, кейін сойып жатқан әрекеттер кездеседі. Мысалы, токпен ұру секілді. Бұл Ислам діні мақұлдаған әрекеттер санатынан емес.
Исламдағы мал союдың өзіндік әдептері мен шарттарына қатысты ҚМДБ-нің ресми дереккөздерінде кең ақпараттар қамтылған.
Мал союда мынадай әдептер мен шарттар бар: Сойылатын малдың көзінше пышақты қайрау ұнамсыз іс, пышақты жасырын қайрап келу қажет. Малды сол жағымен жатқызып, басын құбылаға қаратып сою – сүннет амалдан. Малды сою кезінде зұлымдық етпей, оны қинамау қажет. Яғни пышақтың өткір болуы маңызды. Малды бауыздалар алдында «Бисмиллаһи, Аллаһу Акбар» деп айту шарт. Мал соятын жер нәжіс жер болмауы, бауыздайтын жерге қинап сүйреп апармай, жұмсақ түрде жеткізу керек. Бір малды екінші малдың көз алдында союға болмайды. Мал соярда дәреттің болуы абзалырақ. Мал сою білмесең, қасапшыға жүгіну қажет.
Икрам АЙТАЕВ
