Сұрақ: «Хизбут тахрир» ұйымының қандай айла-тәсілдері бар?
Жауап: Елімізде «Хизбут-Тахрир» ұйымының қызметіне соттың шешімімен 2005 жылдан тыйым салынған. Ұйым-экстремистік ретінде танылған. Ағымның негізгі идеясы – ислами халифат мәселесі және саясатпен айналысу. Басым көпшілігі әлеуметтік желілерде отырады. Оның көзқарасын білдіру үшін қылмыстық жауапкершілік қаралған.
Олардың айласының бірі «біз қолға суық қару алмаймыз, біздің қаруымыз идеология» деп, халықты алдамшы идеясымен санасын улайды. Кезінде «Хизбут тахрир» мүшелері өз қатарларын сұхбат жасау арқылы көбейткен. Олар екі бағытта сұхбат жүргізеді.
Арнайы сұхбат: Оны белгілі бір азаматты күнделікті немесе күнара зиярат ету арқылы жасайды.
Кездейсоқ сұхбат: Кездейсоқ сұхбатқа жоспарланбаған кездесулерде жүргізілген діни уағыз жатады.
Арнайы сұхбат жүргізіп жүрген азаматтың түр-тұлғасын, аты-жөнін, мінез-құлқын өзі бағынышты ұстазына ауызша жеткізіп отырады. Осылайша қысқа немесе ұзақ мерзімді сұхбаттың нәтижесінде өзінің «Хизбут тахрир» партиясының мүшесі екендігін білдіре отырып, ол азаматты да өз қатарларына қосылуға шақырады.
Олардың сыртқы бейнесі зайырлы сипаттада бола береді.
Күдікті азаматтардан сақ болып, діни қажеттілік туындаса, ҚМДБ-ның қызметкерлеріне немесе жергілікті дінтанушы мамандарға жүгіну абзал.
Икрам АЙТАЕВ
