Әкем өмірден өткен, оның көзін көрген достарына құрмет көрсетудің сауабы қандай?

Сұрақ: Әкем өмірден өткен, оның көзін көрген достарына құрмет көрсетудің сауабы қандай?

Жауап: Ислам – әке-шешенің орнын айқындап, оның көзін көргендермен қарым-қатынасты үзбеу мен сақтауға үлкен мән берген дін. Себебі, оларға құрмет көрсету ата-анаға жақсылық жасаудың жалғасы ретінде қарастырылады. Қазіргі қоғамда әке-шешесінің көзі кеткенде ағайын-туыстарымен, достарымен байланысын үзіп қоятындар да бар. Мұндай әрекет Алланың ризалығына бөлемейтін амал екенін білгеніміз абзал. Тірі кезінде де жақсылық көрсету, өлгеннен кейін де, көзін көргендермен қатынасты үзбеу керек.

Әкеңіздің достарын сыйлау – әкеңізге деген құрметтің бірі. Жақын кісілеріне сәлем беріп, хал-жағдайын сұрау, қолдан келсе көмек көрсету, қонаққа шақыру немесе зиярат ету, әкеңізді еске алып, дұға жасап, жақсы сөз айту – ислам құптаған амалдардан. Мұндай амалдар адамның имандылығын арттырып, қоғамда сыйлы болуына себеп болады.

Пайғамбарымыздың (с.а.у.) хадисінде: «Расында кісінің әкесіне көрсеткен ең абзал құрметі – әкесінің достарымен қарым-қатынасты үзбеуі», деген.