Сұрақ: Исламда үміт пен үрейдің мәселесі қандай?
Жауап: Мұсылман адамда үміт пен үрейдің таразысы болу керек. Бірі болмаса, адам рухани тепе-теңдігін жоғатады. Кейде істеген амалдарымен үміттеніп кетсе, адам күнәға жеңіл қарайды. Істеген күнәлары негізінде үрейлі болса, адам түңіліп, үмітін жоғалтады.
Адам нәпсіге еріп, қателікке бой алдырып, күнәға баруы мүмкін. Мұндайда Алланың кешірімді екенін сезініп, тәубеге келіп, жағымсыз қылықтарынан арылып, жақсылыққа үміттенсе, мақсатына жетеді.
Ал, күнә үстіне күнәға бата берсе, берекесі кетіп, қоғамда өз орнын таба алмайды. Нәтижесінде өзіне де, өзгеге де зиянын тигізеді.
«Зүмар» сүресінің 53-аятында: «Былай де: «Ей шектен тыс күнә жасап, өздеріне зиян келтірген құлдарым! Алланың рақымдылығынан үміттеріңді үзбеңдер. Алла күнәлардың барлығын кешіреді. Күмәнсіз, Ол тым жарылқаушы әрі өте мейірімді» деген.
Демек, Исламда қандай қателік жасасақ та, Алланың мейірімі кең екендігін білгеніміз абзал екен.
Икрам АЙТАЕВ
