Жамбыл атындағы Қазақ мемлекеттік академиялық филармониясының сахнасында Франсис Пуленктің «Адам дауысы» монооперасы көрерменге алғаш рет қазақ тілінде жол тартты.
Туынды Жан Коктоның пьесасы негізінде жазылған. Бұған дейін шығарма ағылшын, италия, орыс, испан, жапон, кәріс және украин, тіпті ым-ишара тілдерінде сахналанса, бүгін бұл қатарға қазақ тілі де қосылды.
2023 жылы пьесаны М. Әуезов атындағы Қазақ ұлттық драма театры «Дауыс» деген атаумен сахналаған. Қойылымды қазақ өнерінің майталманы Тұңғышбай Жаманқұлов аударып, режиссер Барзу Абдуразаков сахналап, көпшіліктің ыстық ықыласына бөленген еді.
Ал бүгін аталған туынды жаңа форматта моноопера жанрында көрерменге ұсынылып отыр.
Кештегі жалғыз кейіпкердің монологын Қазақстанның еңбек сіңірген қайраткері Дәрия Жүсіп орындады. Күрделі вокалдық партияны дайындауға белгілі ұстаз, әнші Галина Қарамолдаева атсалысқан.
Операны белгілі дирижер Қанат Омаров бастаған Т. Әбдірашев атындағы ҚР Мемлекеттік академиялық симфониялық оркестрі сәтті сүйемелдеп, сапалы музыка ұсынды. Қойылым режиссері – Фархат Молдағали.
Кеш соңында шығармашылық ұжымға ҚР мәдениет және ақпарат министрлігінің атынан ықылас гүлі табысталды.
