Сұрақ: Баланы имандылыққа қанша жастан баулу қажет?
Жауап: Ислам – бала тәрбиесіне аса мән берген дәстүрлі дін. Баланың рухани тәрбиесі отбасы мен қоғам үшін маңызды. Оны ата-анасынан алса, бағыт-бағдары анық болып, қоғамда өз орнын таба алады.
Ал, рухани ақпаратты әлеуметтік желілердегі бейресми діни дереккөздер немесе араласып жүрген күмәнді ортасынан алса, онда қауіпті.
Мамандар балаға имандылықты дүниеге келген сәттен бастап үйреткені абзал екендігін айтқан. Үш жасқа дейін ата-ананың мінезі, сөйлеуі, бір-біріне қарым-қатынасы баланың жүрегіне сіңеді. Үш пен алты жасқа дейін жақсылық пен жамандық, рахмет айту, үлкенді сыйлау, өтірік айтпау, т.б. сынды қарапайым танымдық ұғымдармен имандылыққа баулу керек.
Жеті жастан кейін бала саналы түрде ойлана бастайды. Осы кезеңнен иман мәселесі, Аллаға сенім, намаз, обал-сауап, халал-харам сынды дүниелерді жұмсақ түрде үйреткені пайдалы екен.
Пайғамбарымыз (с.а.у) хадисінде: «Балаға әкенің берер ең жақсы сыйы – тәрбие», деген.
Иманды да, тәрбиелі ұрмағымыз көп болсын.
Икрам АЙТАЕВ
