Жауап: Қазіргі таңдағы қоғамдағы діни мәселелердің бірі – сәлафизм, уаһабизм идеологиясы. Ол тек Қазақстанда ғана емес, әлемде болып жатқан құбылыс.
Сәлафилік діни ағымының көзқарастарының ерекшеліктері дінараздық алауыздыққа негізделген. Олардың діни уағыздарының мазмұны мен діни еңбектері дәстүрлі ханафи мәзһабы мен матуриди сенім мектебіне, қазақтың салт-дәстүріне қайшы.
Сәлафилікке бет бұрған адам қоғамнан оқшауланып, «біздікі ғана дұрыс, қалғандардың барлығы адасып жүр» деген сенімге байланады. Сонымен қатар, оларға тән қасиеттердің бірі – діни білімі болмаса да діни пәтуа беріп, бір-біріне кереғар діни түсінік қалыптастырып, бір-бірін мойындамайтын жағдайға жеткен. Мұндай көзқарас қоғамға кері әсер етіп, мұсылмандар арасында шиеленіс тұғызады.
Сондықтан да қазіргі сәлафизм идеологиясы – дәстүрлі Исламға қайшы діни ағым. Ғасырлар бойы салт-дәстүрімізбен сабақтасып келген, халықтың рухани өмірінен орын тапқан дәстүрлі Исламнан алыс кетпейік.
Икрам АЙТАЕВ
