Бейсенбі күні кешке Иранда наразылық акцияларының күшеюіне байланысты бүкіл ел бойынша интернет өшірілді. Ел аумағында интернетті пайдаланушылардың белсенділігі кем дегенде 12 сағат ең төмен деңгейде сақталып отыр, деп хабарлайды Kazinform.
Бұл туралы NetBlocks халықаралық интернет мониторингі қызметінің деректері куәландырып отыр.
– Нақты уақыт режиміндегі деректер қазіргі уақытта Иранда бүкіл ел бойынша интернет өшірілгенін көрсетеді, – деп жазды NetBlocks.
Жұма күні таңертең Тегераннан репортаж жүргізген Al Jazeera тілшісі Тохид Асади бейсенбі күні жергілікті уақыт бойынша кешкі сағат 20:00 шамасында мыңдаған адамның көшеге шыққанын хабарлады.
– Біз Иран астанасының көптеген жаңа ауданында адамдардың көшеге шыққанын көрдік. Мен қала орталығынан көлікпен келе жатқанда бірнеше көше жабылды, – деді Асади.
Ол наразылық білдірушілер мен полиция арасында қақтығыс болғанын атап өтті.
