Мемлекеттер басшылары Қасым-Жомарт Тоқаев, Шавкат Мирзиёев, Ильхам Әлиев, Садыр Жапаров және Эмомали Рахмон Ташкенттегі Ислам өркениеті орталығына келді, деп жазады Egemen.kz.
Президенттерге орталық ислам өркениетінің бір бөлшегі саналатын Өзбекстанның бай мәдени-рухани мұрасын терең зерттеу және насихаттау мақсатында құрылғаны жөнінде баяндалды.
Мұндағы ең басты жәдігер – Осман Құраны. Ал оның жан-жағында Құран сүрелерінің санына сәйкес 114 ежелгі кітап қойылады. Ислам өркениеті орталығы 2017 жылы құрылды. Негізгі мақсаты – Өзбекстанның бай мәдени және рухани мұрасын әлемдік ислам өркениетінің ажырамас бөлігі ретінде сақтау, терең зерттеу және танымал ету.
Айта кетелік, Ташкент қаласындағы Хазірет Имам кешенінің жанында орналасқан орталық ғимараты 3 қабаттан тұрады. Бірінші қабатында ғылыми-зерттеу орталықтары, реставрациялау зертханалары, сирек кездесетін қолжазбалар қорлары және музей экспонаттары бар. Ал екінші қабатта көрме залдары, оның басты экспонаты – биіктігі 64 метрлік күмбездің астында орналасқан бірегей артефакт – Осман Құраны қойылған. Үшінші қабатта сирек қолжазбалар және кітаптар жинағы бар орталықтың ғылыми бөлімдері де орналасқан.
Қазіргі уақытта Орталықта 800-ден астам жобалар мен ұсыныстар жинақталған, олар бойынша әлемнің әр түкпірінен келген жетекші шығыстанушы, өнертанушы, тарихшы, теолог, археолог, каллиграф және сарапшы жұмыс істеуде. Жергілікті сарапшылар Ислам өркениеті орталығы – жастарға, жаңа өркениетті жасаушыларға бағытталған, болашақ міндеттерін бейнелейтін өршіл жоба екенін, жаңа технологиялардың көмегімен өткенді зерттеуге мүмкіндік беретінін айтады.
