Газа секторының Хан-Юнис қаласына жасалған Израильдің әуе соққылары бейсенбі күні 33 адамның өмірін қиды. Бұл бомбалау атысты тоқтату туралы келісім жасалғаннан бері ең қанды шабуылдардың бірі болды, деп хабарлайды As-Sahifa.
Израиль тарапы сәрсенбі күні олардың әскері оқ астында қалғанын, бірақ ешкім зардап шекпегенін мәлімдеп, бейбіт тұрғындарға жасалған шабуылды сол оқиғаға «кек алу» деп атады.
Хан-Юнисте орналасқан Нассер ауруханасына 17 адамның мәйіті жеткізілген. Олардың арасында әйелдер мен балалар — 5 әйел және 5 бала бар. Олар босқындарға арналған шатырлар қалашығында тұрған, снарядтардың бірі сол жерге түскен.
Газа қаласында да екі авиабомбаның тұрғын үйге түсуі салдарынан 16 адам қаза тапқан, олардың ішінде 3 әйел және 7 бала бар. Марқұмдардың денелері Аш-Шифа ауруханасына жеткізілген. Денсаулық сақтау қызметкерлерінің айтуынша, қаза болғандар атысты тоқтату келісімі белгілеген шептің екі жағынан да әкелінген.
Газа секторының Денсаулық сақтау министрлігінің дерегінше, атысты тоқтату туралы келісімнен кейін Израиль шабуылдарының саны азайғанымен, соған қарамастан, келісім жасалған уақыттан бері Израиль палестиналық анклавта 300-ден астам адамды өлтірген.
