Сұрақ: Харам мал ризық-несібені азайта ма?
Жауап: Ризық – Алланың пенделерге берген барлық жақсылығы деген мағынаны қамтиды. Яғни, бүкіл жаратылыстың ризық-несібесін Алла береді дегені.
Ислам ризық-несібе табуда адалдықты ұран еткен. Адам баласы адал да, арам да дүние табуы мүмкін. Адал табыста ризық-несібе артады. Арам табыс, арам ас, арам іс адамның ризық-несібесіне береке әкелмейді, керсінше жан тыныштығы кетіп, берекесі қашады.
Саналы адам отбасының берекесін тілеп, еңбек етіп, кәсібінің берекесін артуын Алладан сұрап, еңбек етеді. Демек, адам адал еңбек етсе, Алла ризық-несібесін молынан арттырады екен.
Ризық-несібе жайлы Құран аяттары мен пайғамбарымыздың (с.а.у.) хадистерінде кең баяндалған. «Һуд» сүресінің 6-аятында: «Жер жаһанда ризығы Алладан келмейтін бірде-бір қыбырлаған тіршілік иесі жоқ» десе, «Бақара» сүресінің 172-аятында: «Уа, иман келтіргендер! Өздеріңе ризық етіп бергеніміздің адал, таза һәм денсаулыққа пайдалы болғанынан жеңдер» деп, адалдыққа бұйырады.
Икрам АЙТАЕВ
