Сұрақ: Сахабалар саны нақты айтылған ба?
Жауап: «Сахаба» сөзінің жолдас, серік, сұқбаттас деген мағыналары бар. Діни мағынасы Мұхаммед (с.а.у.) пайғамбардың заманында өмір сүріп, оған иман келтіріп, оның сұқбатында болған мұсылмандар «сахаба» деп аталады.
Ислам тарихында жазылған деректерде жүз мыңға жуық сахабаның болғандығы айтылса, кейбір деректерде жүз мыңнан астам деген көзқарастар да бар. Пайғамбармыздың (с.а.у.) Меккеде қоштасу қажылығында қырық мыңнан астам сахабаның қатысқандығы баяндалған. Хадис жинақтаушы ғалымдар алпыс мыңға жуық хадис риуаят еткен сахабалар болғандығын сөз еткен. Сондай-ақ Пайғамбарымыздың (с.а.у.) жиырма үш жылдық пайғамбарлық қызметінде түрлі тарихи оқиғаларда Исламды қабылдаған сахабалар саны жалпылама деректерде кездеседі.
Сахабалардың қасиеттері жайлы көптеген хадистерде айтылады. Пайғамбарымыз (с.а.у.) хадисінде: «Сахабаларым көктегі жұлдыздар секілді. Қайсысына ерсеңіз де, тура жолды табасыз» деп, діни тағылымда үлгі-өнеге болатындығы айтылған. Олардың діни тағылымын дұрыс үйреніп, асыра діншілдікке бой алдырмай, сақ болғанымыз абзал.
Икрам АЙТАЕВ
