Сұрақ: Дәрет алуда қандай әдептерді сақтағаным дұрыс?
Жауап: Ислам – тазалыққа негізделген дін. Тазалық – иманнан. Барлық құлшылық амалы дәретпен орындалады.
Дәреттің парыз, сүннет және өзіндік әдептері бар. Әр мұсылман дәрет алғанда түрлі нәжістен сақтанып, мұқият болғаны абзал. Кейбір азаматтар дәреттің шарттарына мән бермей немқұрайлық танытады. Мұндай немқұрайлық дәреттің толық болмауына әкеп соқтырады. Дәретің толық болса, ғибадатың толық болады.
Дәреттің мынадай әдептері бар: Дәрет алғанда құбылаға қарау, намаздың уақыты жақындағанда дәрет алып, намазға әзір тұру, дәреттің суы шашырамас үшін дұрыс жерді таңдау, дәрет алған кезде жүзіктерді қимылдатып, астына су кіргізу, ауыз бен мұрынға суды оң қолымен алып, сол қолымен шығару, мойынға мәсіх тарту, дәрет алғанда шаһадат сөзі мен дұға айту, дәрет алғанда сөйлеспеу, т.б.
Пайғамбарымыз (с.а.у.) хадисінде: «Кімде-кім дәрет алып, жүзін жуғанда, бет мүшелері жасаған күнәлары, аяқ-қолдарын жуғанда, сол мүшелерімен жасаған күнәлары су тамшыларымен бірге ағып, тап-таза болады» деген. Демек, дәреттің толық болуы, парыз, сүннет, әдебін сақтауда екен.
Икрам АЙТАЕВ
