ҚМДБ Төрағасы, Бас мүфти Наурызбай қажы Тағанұлының жылдық тапсырмасы аясында Маңғыстау облысы өкілдігі мен ҚМДБ «Зекет және қайырымдылық» қорының ұйымдастыруымен облыс көлемінде дәстүрлі «Мектепке жол» қайырымдылық акциясы өтті.
Игі шара аясында облыстың Бас имамы Әнуар Ізімбайұлының бастамасымен дін қызметкерлері және «Зекет және қайырымдылық» қорының өкілдері бірлесіп, жаңа оқу жылына дайындық ретінде 1300 балаға мектепке қажетті сөмке мен оқу құралдарын сыйға тартты.
Қайырымдылық көмегі ең алдымен әлеуметтік аз қамтылған, көпбалалы, сондай-ақ мүмкіндігі шектеулі отбасылардың балаларына арналды. Мектеп жасындағы бүлдіршіндердің қуанышына себеп болған акция барысында ата-аналар мен балалар алғыстарын білдіріп, жылы лебіздерін жеткізді.
Облыстың Бас имамы Әнуар Ізімбайұлы өз сөзінде:
– «ҚМДБ төрағасы, Бас мүфти Наурызбай қажы Тағанұлы тапсырмасына сәйкес, жыл сайын дәстүрлі түрде өткізіліп келе жатқан «Мектепке жол» акциясы – қоғамдағы ең ізгі істердің бірі. Жаңа оқу жылын қуанышпен бастау – әрбір бала үшін маңызды. Сондықтан осындай қолдау арқылы балалардың білімге деген ынтасын арттырып, олардың болашағына сенім ұялатуды көздейміз», – деді.
Бұл игі бастама өңірдің барлық аудан-ауылдарында жалғасын тауып, дін қызметкерлерінің және жомарт жандардың қолдауымен жүзеге асты. Акцияға үлес қосқан барша азаматтарға алғыс айтылып, олардың бұл еңбегі сауапты іс екені атап өтілді.
