Сұрақ: Лас ақшамен садақа беруге бола ма?
Жауап: Дәстүрлі Ислам – ұлылығымен, тазалығымен жоғары деңгейге ие дін. Мұсылман адам біреуге садақа немесе сыйлық берерде өзінің иелігіндегі таза малынан берсе, бұл оның жан тазалығын байқатады. Садақаны адал түскен қаржыдан берген абзал. Ұрланған, біреуден тартып алынған, әрі өзіне тиесілі емес дүниені садақаға беруде сауап болмайды. Мұндай садақаның жекелеген адамға пайдасы тигенімен, садақа еткен адамға сауап болып жазылмайды.
Сондай–ақ, адам садақаны иелігіндегі лас малынан берсе, бұл оның ашкөздігі мен сараңдығының белгісі. Берген садақада халал, көркем малын шығарып, лас немесе өзі қаламайтын жағымсыз малынан шығармау қажет. Садақа беруде ниет етіп, Алладан сауабын үміт етіп, шынайы ықылас болғаны дұрыс.
Лас нәрсемен садақа беруді Ислам қолдамайды. Абдулла ибн Масғұдтан (р.а.) келген риуаятта: «Расында, жағымсыз зат ұнамсыз нәрсені жоймайды. Алайда, таза зат жағымсыз затты жояды» деген.
Икрам АЙТАЕВ
