Сұрақ: Құранда адамдарды бірлікке шақырған аят бар ма?
Жауап: Құран Кәрім – мұсылмандар үшін қасиетті кітап. Оның тура жолға бастайтынына, ақиқаттығына күмән жоқ. Құран аяттарына мән беріп қарайтын болсақ, бөлінуге немесе діни ағымдарға шақырған аяттарды таппайсыз. Керісінше Құран мұсылмандарды ынтымақ-бірлікке, мейірім мен бауырмалдыққа үндеген. Сондай-ақ жікке бөлінбей, басшыға бағыну мәселесі де айтылған.
Ондағы мақсат – адамның нәпсіге ерік беріп, азғындық пен алауыздыққа баруынан сақтандыру. Алла пенденің қателікке бой алдырып, күнәһар, яки діндар болатындығын шексіз ілімімен біліп, азғындық жолы бұрыс деп ескерткен.
Жалпы Құран аяттары мұсылмандарды бірлікке шақырып, жікке бөлінуден тыйған. «Әл-Имран» сүресінің 103-аятында: «Түп-түгел Алланың жібін (дінінен) бекем ұстаныңдардар да, бөлінбеңдер…» десе, «Рум» сүресінің 32-аятында: «Сондай олар діндерін бөлшектеп, топтарға бөлініп, әрбірі өз алдындағыларына мәз болғандар» деген.
Дін – бөліну үшін емес, адамдарды біріктіру үш келгенін білгеніміз абзал.
Икрам АЙТАЕВ
