Сұрақ: Дәреттің парыздары мен сүннеттері қандай?
Жауап: Дәрет алу – тазалық амалдарының бірі. Мұсылман адам жағдайларына байланысты дәрет, ғұсыл, таямум алады. Дәреттің рәсімі белгілі бір мүшелерді жуу мен мәсіх тартудан тұрады. Оның парыз, сүннеттері мен әдеп, мәкруһтері бар.
Мұсылман адам дәретсіз құлшылық ғибадаттарын орындай алмайды. Себебі намаз сынды ғибадаттың кілті – дәрет. Кейбір жат ағым өкілдері аяқты жуу мәселесінде дәреттің парыздарына немқұрайлы қарайды. Пайғамбарымыз (с.а.у.) хадисінде: «Кімде-кім бұйырылғандай дәрет алып, бұйырылғандай намаз оқыса, өткен күнәлары кешіріледі», деген.
Дәреттің парыздары «Маида» сүресінің 6-аятында баяндалған: «Уа, мүміндер! Намазға тұрар алдында беттеріңді жуыңдар, қолдарыңды шынтаққа дейін (шынтақты қоса) жуыңдар. Бастарыңа мәсіх тартып, аяқтарыңды екі тобығына дейін (тобықты қоса) жуыңдар» деген.
Дәреттің сүннеттері хадистерде баяндалған. Дәретке іштей ниет ету, «Аъузу билла» мен «Бисмилләмен» бастау, іш дәреттен соң қолдарын білектеріне дейін жуғаннан кейін алдымен үш рет аузына су алып шайқап төгу, үш рет мұрнына су алып төгу. Дәрет алғанда қол мен аяқ саусақтарының арасын салалап жуу керек. Дәретте реттілік болғаны дұрыс.
Сондай-ақ, оның сүннеттері мен әдептері, мәкруһтері жайлы толығырақ білду үшін ҚМДБ-ның ресми сайттарына жүгінуге болады.
Икрам АЙТАЕВ
