Жаздың аптап ыстық күнінде, жамағат күйіп бара жатқан дәнді дақылдарын сақтап қаламыз деген үмітпен, жұма намазынан кейін мешіт имамымен бірге далаға жаңбыр тілеу – тасаттық намазына барады.
Жаңбыр тілеу намазы оқылып, дұғалар жасалып, құрбандықтар шалынады, бірақ бір де бір тамшы жаңбыр жаумайды. Алланың ісіне шарасыздық танытқан қауым қалаға қайтып оралады.
Арада біраз күн өткен соң, Алланың досы болған тақуа адамның жолы осы қалаға түседі.Қала халқы әлгі тақуаға келіп, олар үшін жаңбыр тілеп, дұға етуін өтінеді.
Бірақ, тақуа адам жаңбыр тілеу намазының орнына қаланы бірге аралауды ұсынады.Адамдар таңданыспен әрі қызығушылықпен әлгі адамның артынан еріп, үйлерді аралай бастайды.
Үш-төрт үйді айналып өтіп, шатыры тесік, есігі сынық үйге кездеседі және әлгі адам есікте тұрып, үйдегілерді шақырады. Ішінен орта жастағы әйел мен екі жетім қыз шығады. Олардан хал-жағдайларын сұрасқаннан кейін, бұл үй иесінің жүрек талмасына ұшырап, ерте жасында қайтыс болғанын және әйелдің екі жетім қызымен жалғыз қалғанын біледі.
Әлгі адам әйелмен әңгімелесіп болғаннан кейін, қыздардың не тілектері бар екенін сұрайды. Олардың бірі үйіне жаңа шатыр керек екенін айтса, екіншісі өзіне жаңа аяқ киім қажет екенін жеткізеді.
Әлгі адам қасындағы жамағатқа бұлардың үйіне жаңа шатыр, екінші қызға аяқ киім сатып алуды тапсырады. Жаңа шатыр мен аяқ киім әкелінген соң, әлгі адам кішкентай қыздардан «Алладан нені сұрап көп дұға етесіңдер, қане аталарыңа айтыңдаршы», деп өтінеді.
Қыздардың біреуі: «Жаңбыр жауған кезде, біздің төбеміз тесік болғандықтан, мен әрқашан Алладан үйіміз ылғал болмауы үшін жаңбыр жаудырмауын сұраймын», дейді. Екінші қыз болса: «Мен де аяқ киімім тесік болғандықтан, жаңбырлы ауа райында аяғымның суланбауын қалаймын және Алладан әрқашан жаңбыр жаудырмауын сұраймын» деп жауап береді.
Қыздардың жауабын тыңдаған соң, тақуа адам осы жағдайды жанындағы жамағатқа түсіндіріп: «Егер сендер Алланың құзырында дұғам қабыл болсын десеңдер, біреудің дұғасын қолыңнан келгенше орындамайынша, сенің дұғаң қабыл болмайды», деп сөзін түйіндейді.
Пайғамбарымыз (с.а.с.): «…Кімде-кім мұсылман бауырының қажетіне жараса, Алла Тағала да оның қажетін өтейді» деген. (Бухари мен Муслим)
Алла Тағала баршамызға қабыл болатын амал мен қабыл болатын дұға жасауды нәсіп етсін!
Қуат ҚАБДОЛДА
