Сұрақ: Жолаушы адам парыз намаздарын қалай оқиды?
Жауап: Адам түрлі себеппен сапарға ниеттеніп, үйінен жолға шыққаннан бастап, жолаушы саналады. Сапарда төрт ракағатты бесін, екінті, құптан намаздарын екі ракағатты қылып оқу – уәжіп. Жолаушы он бес күннен аз қалуға ниет етсе, намаздарын қысқартып оқиды.
Қазіргі уақыттағы көліктер, ұшақтар т.б жолаушы үкімін өзгерпейді.
Исламтанушы ғалымдар алыс жолға шығудың жағдайларын хадис негізіндегі ақпараттарды талдай келе тоқсан шақырымнан астам жерге сапарға шықса, жолаушы адам болып саналатынын шариғатқа сай деп білген.
Жолаушы адамға ораза күндері болса, оразасын басқа күндері өтеуіне болатыны, төрт ракағаттық парыз намаздарын екі ракағаттан оқуы – Алланың берген жеңілдігі.
Имам Мүслімде келген хадисте: «Омар (р.а.) Пайғамбарымыздан (с.а.у.): «Намазды неге қысқартамыз?» – деп сұраған. Пайғамбарымыз (с.а.у.): «Алланың сендерге жасаған садақасы, Оның садақасын қабыл алыңдар», – деген.
Түрлі машақаттан сақтанып, Алланың жолаушыға жасаған жеңілдіктерін пайдаланған – қайырлы іс.
Икрам АЙТАЕВ
