Сұрақ: Жетімге қамқорлық жасаудың сауабы қандай?
Жауап: Исламда жетімге жасалған жақсылықтың өзіндік мәртебесі мен сауабы мол. Дінімізде жетім деп әкесінен немесе ата-анасынан айырылған кәмелет жасына толмаған баланы айтады. Кәмелет жасына толғаннан кейін бала жетім деп саналмайды.
Оларға қолдау білдіру – сауап іс. Дінде отбасын асыраушы, қорғаушы әке есептеледі. Жетімнің көз жасынан ауыр тамшы жоқ. Ата-ана қамқорлығынсыз қалған балаларға мейірімділік пен қамқорлық таныту жомарттық пен көргендік. Жетімге жасалған жақсылық Алланың разылығына бөленуге себеп болады, мал-дүниеге береке кіреді, қоғамда мейірім мен әділетттілік орнығады, жүректі жұмсартады, мейірімділік пен адамгершілікті арттырады.
Пайғамбарымыз (с.а.у.) хадисінде: «Көңіліңнің жұмсаруын және қажеттілігің орындалуын қаласаң, жетімге мейірімділік етіп басынан сипа және жегеніңді оған да жегіз» десе, тағы бір хадисте: «Жетімге қамқор болып, оны асыраушымен жәннатта мына екуміздей боламыз», деп екі саусағын (сұқ және ортаңғы) қатар көрсеткен» деген. Алланың ризашылығына бөленетін игі амалдың бірі жетімге жақсылық жасау екен.
Икрам АЙТАЕВ
