Өзінің атеист екенін жасырмайтын және әлеуметтік желіде Ислам құндылықтарын жоққа шығарып жүретін белгілі инвестор Марат Толыбай сүндеттеуге қатысты жазба жариялап, онда бұл амалды «балаға жасалатын зорлықтың бір түрі» деп атады.
«Менің ойымша, бұл дұрыс емес, себебі бұл – балаларға жасалатын зорлықтың бір түрі. 3-5 жастағы бала өзінің діни ұстанымын әлі толық түсінбейді және саналы таңдау жасай алмайды. Ал ата-анасы оның орнына шешім қабылдап, оны мұсылман не яһуди ретінде тәрбиелеуді ұйғарса, бала бұл жағдайда дәрменсіз.
Сондықтан мұндай жастағы ұл балаларды сүндетке отырғызу – бұл нағыз балаларға жасалатын зорлық деуге болады» деп жазды ол.
Сонымен бірге жазба иесі сүндеттеудің денсаулыққа пайдалы екенін де жоққа шығарады. Оның айтуынша, кейбір ерекше жағдайларда ғана дәрігерлер белгілі бір дертке байланысты сүндеттеуді ұсынады, бірақ ол тұтас ұлтқа арналмаған.
«Егер бұл барлық ер адамдар үшін шын мәнінде қажет болса, онда бүкіл әлем солай жасар еді. Бірақ жер бетінде миллиардтаған ер адам сүндеттелмеген, соған қарамастан дені сау, бақытты өмір сүріп жатыр. Сондықтан сүндеттеуді денсаулықпен байланыстыру – жалған сылтау» дейді ол.
Марат Толыбай сөзінің соңында Қазақстанда бала жаста сүндетке отырғызуға заң жүзінде тыйым салуды ұсынады. Оның пікірінше, 18 жаста толғаннан кейін әр адам сүндетке отыра ма, жоқ па, қай дінді ұстанатынын өзі шешуге тиіс.
Сіз қалай ойлайсыз, оқырман? Бұл пікірмен келісесіз бе?
