Сұрақ: Умра ғибадаты парыз амал ма?
Жауап: «Умра» сөзі арабтың зиярат ету деген мағынаны береді. Арнайы Мекке қаласының қасиетті орындарында жасалатын құлшылық. Діни мағынасы құрбан айт күндерінен басқа уақыттары жылдың кез келген күнінде ихрамға кіріп, тауап және сағи жасағаннан кейін шашын алғызып немесе қысқартып ихрамнан шығу жолдарымен қасиетті (Меккеде) орындарда атқарылатын ғибадат.
Умра жасаудың мәні мұсылманның Жаратушыға деген шынайы ықыласы мен құлшылығын көрсетеді. Умра рәсімін жасауда мол сауап бар. Ол рухани тазаруға, тәубе етуге, иманын күшейтуге бағытталуға тиіс. Басқа ниетпен бару сауап болмайды. Умра рәсімін жасау барысында бекітілген тәртібін сақтау міндет. Қосымша парыз, уәжіп, сүннеттерін жауапты имамдардан сұрап алғаны абзал.
Умраның қасиеттері жайлы хадистерде көп айтылған. Ханафи мәзһабында шамасы келген мұсылманға умра жасау – бекітілген сүннет. Пайғамбарымыз (с.а.у.) хадисінде: ««Бір умра екінші умраға дейінгі аралықта жасалатын күнәларға кәффарат (өтем), ал қабыл болған қажылықтың сауабы – жәннат», деген.
Икрам АЙТАЕВ
