Махаббат, сүйіспеншілік, жақсы көру деген сөздерді естісек, адамның көз алдына ең алдымен қыз бен жігіт елестейді. Онан кейін ата-анаға, балаға деген, сол сияқты жалпы адамдарға деген махаббатты ойлайды.
Тіпті, кейбір адамдар махаббаттан мүлдем мақрұм, есесіне дүниені, ақшаны өзінің туған анасынан да, баласы, туған-туыстарынан да артық жақсы көріп жататын жайттарды да өмірде кездестіретініміз ақиқат.
Ал мұсылмандардың сезімі басқалай болуы керек. Мүмін үшін Аллаға және Пайғамбарымызға (с.ғ.с.) деген сүйіспеншілік барлық нәрседен де артық тұруы тиіс. Бірақ кейбір мұсылмандардың арасында да пайғамбарымызға (с.ғ.с.) деген жақсы көру сезімін қалай оятсақ болады деген сұрақтың жауабын іздегендер де табылады.
Бұл сұраққа кімнің пайғамбарымызға (с.ғ.с.) деген сүйіспеншілігі әлсіз болса, онда оның Аллаға деген сүйіспеншілігінің де әлсіз болғаны деп жауап беріп жатады ізгі-тақуалар.
Себебі, кім қаншалықты Алланы сүйсе, оның пайғамбарына (с.ғ.с.) деген сүйіспеншілігі де соншалықты болғаны. Аллаға деген бойұсынушылығы қандай дәрежеде болса, сондай дәрежеде пайғамбарымызға (с.ғ.с.) бойұсынады.
Құранда Алла Тағала «Әли имран» сүресі, 31-аятында: «Мұхаммед (с.ғ.с.) оларға: «Егер Алланы сүйсеңдер, онда маған ілесіңдер. Алла Тағала сендерді жақсы көріп, күнәларыңды жарылқайды. Өйткені Алла аса жарылқаушы, ерекше мейірімді» де», – деген.
Сахабалардың пайғамбарымызды (с.ғ.с.) қалай жақсы көргендігі туралы оқиғаларды білу арқылы да олардан көптеген үлгі алуға болатынына көзіміз жетеді.
«Сен енді иман келтірдің, Омар»
Бірде пайғамбарымызбен (с.ғ.с.) Омар бірге келе жатты. Омар:
– «Иә, Алланың Елшісі, өзімнен басқаның барлығынан сені артық жақсы көремін»,-дейді. Пайғамбарымыз (с.ғ.с.) оған:
– «Сен мені өзіңнен де артық жақсы көрмейінше, иман келтірген болмайсың»,-деді. Сонда Омар:
– «Иә, Алланың Елшісі, шын мәнінде, енді мен сені өзімнен де артық жақсы көріп кеттім», – дейді. Бұған пайғамбарымыз (с.ғ.с.):
– «Міне, сен енді иман келтірдің, Омар», – деді.
“Мені бір нәрсе алаңдатып жүр”
Пайғамбарымыздың (с.ғ.с.) жанында әрдайым жүретін сахабалар оны бір сәт көрмесе тағат таппай, сағыныштан оны қайта көруге асығатын. Бірде пайғамбарымызға (с.ғ.с.) бір сахаба келіп:
– «Иә, Алланың Елшісі, шын мәнінде, мен сені өзімнен де балаларымнан да бүкіл адамдардан да артық жақсы көремін. Ал қашан мен үйге барып, сен туралы жанұямның арасында айта бастасам, менің күш-қуатым мен сабырлылығым оған жетпей, сені қайта көруге және сенің дауысыңды есту үшін мен үйден атып шығып саған қарай аялдаймын. Бірақ мені бір нәрсе алаңдатып жүр. Алла Тағала жәннаттың ең жоғарғы сатысын саған беруге уәде етті. Егер сені онда көре алмасам ол жақта мен не істеймін?»-дейді. Бұған пайғамбарымыз (с.ғ.с.) ешнәрсе деп тіл қатпады. Себебі, Ол не жауап қатарын білмеген еді. Кейін оның жауабын Алланың Өзі жіберген еді: «Ал және кім Аллаға, пайғамбарға бойұсынса, міне, солар АллаТағала нығметке бөлеген пайғамбарлар, шыншылдар, шәһиттер және игілермен бірге болады». («Ниса» сүресі, 69-аят)
Иә, бұл Аса Мейірімдіден болған ұлы жауап еді. Жақсылықтың қайтарымы – тек қана жақсылық.
Дайындаған – Тұрар ТҮГЕЛҰЛЫ
