Сұрақ: Оразаға қандай рухани дайындық жасаған дұрыс?
Жауап: Исламдағы бес парыздың бірі – Рамазан айында ораза ұстау. Рамазан айында ауыз бекіту һижраның екінші жылы парыз етілді. Ораза араб тілінде «сыям, саум» деп аталады. Шариғат терминінде «арнайы ниет ете отырып, таңның атысынан, кештің батысына дейін ішіп-жеуден, нәпсі қалауларынан тыйылу» деген мағынада.
Ораза айына рухани дайындық жүректі нәпсіден тазарту, құлшылық ғибадатқа көңіл бөлу, жан мен тән тазалығынан басталады. Ораза айы жақын қалғанда мына амалдармен дайындық жасалғаны дұрыс:
Оразаны Алланың ризашылығы үшін ұстайтынын жүрекке бекіту, адамның басынан өткен күнәларі үшін шынайы тәубе ету, кешірім сұрау, оразаның алдында Құран оқуды бастау, намаздан кейін жиі зікір-дұғалар айту, тұрақты бес уақыт намазға бейімделу, қосымша нәпіл намаздарды арттыру, артық тамақтанудан бас тартып асқазанды ауыз бекітуге дайындау, шамасынша мұқтаж жандарға қол ұшын беру, жағымсыз жаман әдеттерден арылу, өтірік, өсек-ғайбаттардан сақтану.
Рамазан айында рухани тазару арқылы Аллаға жақындап сауаптардан үміт ету екенін түсінгеніміз абзал. Ораза айын өз деңгейінде өткізуді Алла нәсіп етсін.
Икрам АЙТАЕВ
