Дәретсіз кіруге бола ма?
Жауап: Мешітке дәретсіз кірудің оқасы жоқ. Алайда мұсылман адам қайда болса да дәретпен жүргені мұстаһаб саналады[1]. Өйткені Пайғамбарымыз (оған Алланың салауаты мен сәлемі болсын) Біләлға (р.а.) жәннатта кебісінің дауысын естігенін айтып, одан қандай амал жасағанын сұрағанда: «Азан айтып болған соң екі ракағат намаз оқыдым және дәретім бұзылса, сол сәтте қайта алатынмын»[2], – деп жауап берген. Бұл хадис үнемі дәретпен жүрудің артықшылығына әрі мұстаһаб екендігіне дәлел болады[3]. Сондай-ақ Әбу Һурайрадан жеткен хадисте Алла Елшісі (оған Алланың салауаты мен сәлемі болсын): «Сендердің бірулерің намаз оқыған орнында (мешітте) дәреті бұзылғанша болса періштер оған: «Уа, Алла! Оған кешірім ет. Уа, Алла! Оны мейіріміңе ал» деп дұға етеді»[4], – деген.
Ғұсылсыз кіруге бола ма?
Жауап: Жүніп (бой дәреті жоқ) адамға ғұсыл құйынбайынша және хайыз бен нифас қаны келген әйелдерге мешітке кіруге болмайды[5]. Пайғамбарымыз (оған Алланың салауаты мен сәлемі болсын):
لا أُحِلُّ الْمَسْجِدَ لِحَائِضٍ وَلا جُنُبٍ
«Жүніп адамға да, хайызы келген әйелдерге де мешітке (кіру) халал емес»[6], – деген.
Егер мешітке кіруге қатты қажеттлік туындаса, зәру болса, онда таяммум алып кіреді. Өйткені ол су жоқ кезде тазалықтың орнын басады. Ал мешітте ұйықтап жүніп болып қалса, таяммум алып сыртқа шығуы керек[7].
ҚМДБ Шариғат және пәтуа бөлімі
[1] «Хашияту әт-Тахтауи», 83.
[2] Термизи, №3689.
[3] Ибн Хажар, «Фәтху әл-бәри», 3/35. Ән-Нәуауи, «Шәрху Муслим»,8/13.
[4] Бұхари, №93.
[5] «Радду әл-мухтар», 1/486. «әл-Мәбсут», 3/180. «әл-Һидәя», 1/31.
[6] Әбу Дәуіт, №232.
[7] Мәусули, «әл-Ихтияр», 1/63-64.
