Бүгін Астанада Қазақстан мұсылмандары діни басқармасының ұйымдастыруымен «Қоғамда ізгілікті насихаттаудың мәдениеті» ІІ Республикалық уағызшылар форумы өтті.
Форум жұмысына ҚР Мемлекеттік кеңесшісі Ерлан Қарин, ҚМДБ Төрағасы, Бас мүфти Наурызбай қажы Тағанұлы, сондай-ақ онлайн және офлайн форматта 700-ден астам уағызшы-имамдар, Діни басқармаға қарасты Республикалық ақпараттық-насихат тобының мүшелері қатысты.
Мемлекеттік кеңесші Ерлан Қарин Мемлекет басшысы Қасым-Жомарт Тоқаевтың Ұлттық Құрылтайда көтерген адамгершілік және жауапкершілік, әділдік және адалдық, бірлік пен ынтымақ сынды құндылықтарды қоғамда кеңінен дәріптеудің маңызына айрықша тоқталды. Сонымен қатар Президент атап өткен әлеуметтік кеселдермен күресудің өзектілігін тілге тиек етті.
Іс-шарада баяндама жасаған ҚМДБ Төрағасы, Бас мүфти Наурызбай қажы Тағанұлы уағызшылардың қоғам алдындағы жауапкершілігі, жамағатқа даналық жолмен насихат айтудың маңызы жайлы сөз қозғады.
Форум жұмысында «Үгіт-насихат айтудың тәртіптік ережесі» құжаты қабылданды.
Сондай-ақ осы күні имамдарға арнайы семинар өтті. Онда «Балаби қари» Құран жаттау орталығының директоры, Ғұламалар кеңесінің және РАНТ мүшесі Арман Қуанышбаев «Ислам насихатының қайнар көздері және оны ұсыну жолдары» тақырыбында, ал «Мұнара» газетінің бас редакторы Серікбол Хасан «Медиадағы уағыз-насихат» тақырыбында және Бас мүфти кеңесшісі Смайыл Сүйерқұлұлы «Дін қызметкерінің әдебі» тақырыбында дәріс оқыды.
Сондай-ақ ҚМДБ Уағыз-насихат бөлімінің меңгерушісі Батыржан Мансұров еліміздің түкпір-түкпірінен келген уағызшы-имамдарға алғысын білдіріп, оларды алдағы уақытта да мүфтият бастамаларына қолдау танытып, халыққа насихаттауда белсенді болуға шақырды.
