Сұрақ: Дінаралық татулықтың мәні неде?
Жауап: Қазақстан Республикасы – көпұлтты, көпдінді мемлекет. Дінаралық татулық пен бейбітшілікті сақтау – баршаға міндет. Әлемдегі барлық дәстүрлі діндер ізгілікке негізделген. Олар адамдарды дұрыс өмір сүруге, тура жолға және шыдамды болуға, екінші біреудің ала жібін аттамауға, жаман істерден аулақ болуға шақырады.
Әртүрлі діни сенімдер мен мәдениеттердің бір-біріне құрметпен қарауы адамдар арасындағы түсіністікті арттырып, діни жанжалдардың алдын алады. Дінаралық жікке бөлінушілік – мұсылмандарға жат сипат. Діндер арасына бүлік салып, діни алауыздық отын қоздыру – харам және тыйым салынған іс. Дінараздық алауыздық салудың салдарынан діндер арасында береке қашып, жазықсыз адамдар, бейкүнә сәбилер жапа шегіп, діни тұрақтылық жойылады.
Конфессияаралық татулықтың маңыздылығы мынада: Діни қақтығыстардың алдын алады, қоғамда діни тұрақтылықты қалыптастырады, түрлі конфессия өкілдерінің арасында діни сенімдер бойынша түсіністікті қалыптастырады, конфессияаралық тұрақтылық елдің экономикалық және әлеуметтік дамуға үлесін қосады.
«Хужурат» сүресі 13-аятында: «Уа, адамдар! Шүбәсіз, сендерді бір ер мен бір әйелден жараттық. Сондай-ақ сендерді бір-біріңмен танысып, табысуларың (һәм біріңе-бірің қамқоршы дос болып, өзара жәрдемдесіп, тату-тәтті өмір сүрулерің әрі жер бетін көркейтулерің) үшін сан алуан ұлыстар мен руларға бөлдік…» деген.
«Өз дініңе берік бол! Өзге дінді құрмет тұт» дегендей, діни тұрақтылықты сақтауға үлесімізді қоса берейік.
Икрам АЙТАЕВ
