Сұрақ: Адамның айыбын айту күнә ма?
Жауап: Ислам бір адамның жамандығын сөз етуден, ол жайлы жаман ойға барудан қайтарады. Өйткені мұндай амалдар адамға сыйластық емес, бір-бірінің кем-кетігін қазбалауға апарады. Оның салдары дұшпандыққа ұласады. Барынша мін іздемей татулықты сақтап, жақсы қасиеттеріне көңіл аударғынымыз абзал.
Адамның басқаларға айтқан кемшілігі шын болса, ол – өсек, жалған болса – жала болады. Егер адамға немесе қоғам үшін қауіпті, әділетсіздікке куә болса, зұлымдық т.б. жағдайларда біреудің айыбын айтуға рұқсат етіледі. Егер адам біреудің айыбын жұртқа айтуы – әлгі адамның беделін түсіруге бағытталса, әрі сол туралы естіген жұрттың жаман ойлауына жол ашатын әрекет болса, ауыр күнәлардан саналады.
Пайғамбарымыз (с.а.у.) хадисінде: «Кім бір мұсылманның айыбын жасырса, Алла да сол адамның қиямет күні айыбын жасырады», десе, тағы бір имам Тирмизиден келген хадисте: «Діндес бауырын бір кінәсі үшін айыптаған адам сол күнәні өзі де істемейінше өлмейді» деген.
Кемелдік пен нағыз мұсылмандық қасиет – өзінің айыбын жасырып, кемшілік іздемей, сынап-мінеуден сақтанып, өз мініңді түзеуге күш салғанымыз.
Икрам АЙТАЕВ
