Табиғиндер кезінде Мәдинада бір бай адам бар еді. Сол қайтыс болғанда, адамдар: «Соншалықты бай бола тұрып бірде-бір адамға пайдасы тимеген сараң адам болатын» деп күбірлесіп тұрады.
Сол сәтте бір адам орнынан тұрып: «Құрметті жамағат! Сіздер бұл адамның жаназасы шықпай жатып, оны ғайбаттап, өлі етін жеп жатсыздар. Мен бұл кісі айтпа деп өтінсе де, мына жағдайда ақиқатты айтуға мәжбүрмін. Бұл адам Мәдинадағы жетпіс мұқтаж жанұяның қажетін мойнына алған адам болатын. Мен ай сайын, сол кісінің аманатын орындап, сол мұқтаж отбасыларға көмегін апарып беретін едім. Ал сол отбасылар оларға бұл адам көмектескенін де білмейді» деп сөзін аяқтайды.
Расында, Алла Тағала: «Әй мүміндер! Күмәнның көбінен сақтаныңдар. Өйткені, күмәнның кейбірі күнә…» деп бұйырған. (Хужурат:12)
Алла Тағала баршамызға әркім жайлы жақсы ниетте, жақсы ойда болуға жазсын!
Қуат ҚАБДОЛДА
