Қостанайдағы «Марал Ишан» мешітінде ұрлық жасаған адам ұсталды, деп жазады Egemen.kz.
39 жастағы ер адам өзгенің сырт киімін қолды еткен. Оның бұл әрекеті мешіт ішіндегі бейнебақылау камерасына түсіп қалған.
Полиция күдіктіден бұл әрекетіне түсінік беруді сұрағанда, өзінің киімі жұқа екенін сылтауратқан. Құзырлы орган ер адамның деструктивті радикалды ағымдардың жақтаушысы болғанын хабарлады.
Қазіргі уақытта полиция қызметкерлері қылмыстық кодекстің 188-бабы «Ұрлық» бойынша сотқа дейінгі тергеп-тексеру жүргізіп жатыр. Күдіктінің осы сипаттағы өзге де қылмысқа қатысы бар-жоғы да анықталады.
Айта кету керек, мешітке намаз оқуға барғанда жеке заттарға абай болу керек. Қазіргі таңда ұрылар да мешіттерді жағалайтын болған, өйткені ол жерде ұрлық жасау оңайырақ. Сондықтан мешіт екен деп бейжай қарамай, заттарымызға мұқият болған жөн.
