Сұрақ: Ғұсыл, дәрет алғанда кейбір жеріме су тимеген сияқты ойда боламын. Осындай күдіктен қалай арылсам болады?
Жауап: Мұсылман адам қажеттілігіне орай ғұсыл, таяммум, дәрет алу арқылы құлшылық амалдарын орындайды. Әдетте дәреттен кейін намазхандарда күмәнді ойлар кездеседі. Исламда дәретті бұзатын мани, жел шығару, т.б. негізгі жағдайлар болмаса, күмәндануға негіз жоқ.
Дәрет мәселесіндегі қағиданың бірі – «Күмән – нақты дәлелдің орнын баса алмайды». Пайғамбармыздың (с.а.у.) хадисінде: «Біреудің ішінен бір нәрсе сезінсе, бірақ ол шыққанына нақты сенімді болмаса, дәрет алмасын» деген.
Күдіктен арылу үшін мән беретін жағдайлар: Адам дәрет алып болғаннан кейін дәретім толық және қабыл болды деген сенімде болуы керек. Алладан күмәнді (уасуаса) ойлардан сақтану үшін дұға жасағаны абзал. Күмәнді ойлар келсе, оны елемей жүректі тыныштандырып, дұрыс ниеттенгені жөн.
Пайғамбарымыз (с.а.у.) хадистерінде: «Кімде-кім әмір етілгендей дәрет алып, әмір етілгендей намаз оқыса, өткен күнәлары кешіріледі», «Жақсылап алынған дәрет – иманның жартысы» деген. Дәрет алғанда толық сенімді болу күдіктен арылтады.
Икрам АЙТАЕВ
