Сұрақ: Көз тигенде, өзіміз білетін аят, дұғалармен дем салуға бола ма?
Жауап: Қазіргі таңда сиқыр жасалыпты, көз тиіпті, жын тиіпты, т.б. деген сөздер жиі айтылып жатады. Мұндай жағдайлардан білетін сүрелерді, дұғаларды тақ етіп оқу арқылы өзіне дем салуға болады.
Пайғамбарымыз (с.а.у.) Құран аяттарымен дем салуды құптаған. Мүмкіншілік болмаса дем сала алатын имамның көмегіне жүгінуге болады. «Фатиха», «ясин», «ықылас», «фалақ», «нас», «кафирун» «аятул әл-Курси» т.б. сүрелер мен аяттарды оқып, дем салуға болады.
«Исра» сүресінің 82-аятында: «Біз Құраннан мүминдер үшін шипа һәм рақым болатын аяттар түсіреміз», деген. Пайғамбарымыз (с.а.с.) хадисінде: «Аллаһумма, Раббан-нәәси, музһибәл-бәъси, ишфи Әнтәш-Шәәфи, лә шәәфиә иллә Әнта шифәәъән лә юғадиру сақаман!/- «Уа, Алла! Адамдардың Раббысы, кеселдерді кетіруші, шипа бер! Сен шипа берушісің. Сенің шипаңнан басқа шипа жоқ. Бұдан кейін аурудың ізі де қалмайтындай етіп сауықтыр», – деген.
Осындай мазмұнда басқа да дұғалар көптеп кездеседі. Шариғатта құпталмаған іс-әрекеттерден сақ болу мен дертке шипаны бір Алланың беретіндігіне, ал аяттардың тек себеп қана екендігін ұғыну қажет.
Икрам АЙТАЕВ
