Ардақты сахаба Осман ибн Аффан (Алла одан разы болсын) былай дейді: «Кімде кім 5 уақыт намазына бекем болып, оны әрдайым өз уақытында оқитын болса Алла Тағала оған тоғыз түрлі қасиет береді. Ол тоғыз қасиет мыналар:
- Алла Тағала ол құлын жақсы көреді.
- Деніне саулық береді.
- Ол пендесін періштелер қорғап жүреді.
- Үйіне Алланың берекеті жауады.
- Жүзінде салихалықтың нұры, ізі болады.
- Алла жүрегін жұмсақ етеді.
- Қияметте сырат көпірінен найзағайдың жарқылындай жылдам өтеді.
- Тозақ отынан қорғанышта болады.
- Қияметте ешқандай уайым да қорқынышта көрмейтін Алланың ізгі құлдарымен бірге болады».
Алланың нығметін санасақ, санына жете алмасымыз – ақиқат. Міне, осындай жоғары мәртебеге ие жаратылыс ретінде жер жүзінде сансыз нығметтермен ризықтандырып, өмірдің сан алуан жақсылықтарын нәсіп еткені үшін Аллаға құлдарының шүкіршілік етуі заңды.
Алла Тағала адам баласын мына дүниеге Өзін танып-біліп, құдіретіне бас иіп, құлшылық етсін деп жіберген. Адам пайғамбардан (ғ.с.) бастап белгілі бір уақыттарда орындалатын намаздар болған. Ал Мұхаммед (Оған Алланың салауаты мен сәлемі болсын) үмбетіне бес уақыт намаз Миғраж түнінде парыз болды. Миғраж «түнгі серуен» деген мағынаны білдіреді. Мәдинаға көшпестен бір жарым жыл бұрын (яғни, 621 жыл) ережеп айының 26-сынан 27-сіне қараған түні Пайғамбарымыз (Оған Алланың салауаты мен сәлемі болсын) пыраққа мініп, Жәбірейіл періштемен бірге Раббы әлеміне сапар шеккен. Осы сапарда мұсылмандарға бес уақыт намаз парыз етілген.
«Уа, Алла! Өзіңді еске алуға, Өзіңе шүкіршілік етуге әрі Өзіңе көркем түрде құлшылық етуге маған жәрдем ете гөр».
Дайындаған – Тұрар ТҮГЕЛҰЛЫ
