Сұрақ: Құрбан айттан басқа уақытта қой сойып етін тарату, құрбан шалған болып есептеледі ме әлде жай тарату ма?
Жауап: Құрбан – жақындау деген мағынаны білдіреді. Ал шариғаттағы терминдік мағынасы – Аллаһ Тағаланың ризашылығына жақындау ниетімен сойылған малдың аты. Құрбан айт күндері құрбандық шалу жағдайы бар, басы бостандықтағы, ақыл-есі дұрыс, сапарға шықпаған мұсылманға уәжіп. Ал, құрбан айт күндерінен басқа уақыттарда да Аллаһтың разылығы үшін құрбандық шалуға болады. Құрбандықтың басқа да түрлері бар. Мысалы дүниеге сәби келгенде, Аллаһ Тағаланың нәсіп еткен перзентіне шүкір ретінде шалынатын малға «ақиқа» құрбаны делінеді. Сондай-ақ, белгілі шарттардың орындалуына байланысты мұсылман баласы бір малды құрбандыққа шаламын деп уәде етіп, уәденің уақыты келгенде шалатын малға «нәзір құрбаны» делінеді. Мысалы ауырып жатқан адам осы ауруымнан айықсам, бір қойды құрбандыққа шаламын деп ниет етсе, ауруынан айыққан жағдайда, бір қойды құрбандыққа шалуы уәжіп (міндет) болады. Ескерту: «Нәзір» құрбанына шалынған малдың етінен, шалған адамның өзіне, балаларына, немерелеріне және әке-шешесіне тіпті ата-әжелеріне жеуге болмайды. Түгелдей садақа ретінде кедей-кепшіктерге таратылуы тиіс. «Ақиқа» құрбанының етінен шалған адамның өзі жей алады. Қаласа садақа етеді.
