Кейбір адамдар: «Құранда барлық нәрсе айтылған дейсіңдер. Бірақ неге анау туралы айтылмаған, мынау жайында жазылмаған?» деп сұрап жатады. Осындайда біз: «Құран – Алланың адамзатты тура жолға бастайтын сөзі. Онда тікелей әр нәрсенің аты айтылмаса да, барлық сұрақтың жауабы бар» деп пікір білдіреміз.
Мәселен, сондай сұрақтардың бірі – Құранда бағдаршам туралы айтылған ба?
Бағдаршам не үшін керек? Жол ережесін сақтау үшін, біреудің хақысын бұзбау үшін, біреуге жапа көрсетпеу үшін керек. Көлікпен жүрген уақытта нені байқаймыз? Автожүргізушілер бағдаршамда тұрғанда, асығыстық танытып, біреудің алдын кесіп, ашуланып, біреуді ренжітіп, балағаттап, тіпті жол апатын туғызатын жағдай жасап жатқандарын көреміз. Міне осы нәрселерің алдын алу үшін бағдаршам қойылады.
Мұндай жағдай, керек десеңіз, мешітте бір қатарда намаз оқып шыққан намазхандар арасында да болады. Намаздан шыға сала, автотұрақта тұрған көлігіне мінгенде, асығыстық танытып, діндес бауырының хақысына кіріп жатады. Әлбетте, өз кезегінде жаяу жүргіншілер де бағдаршамға бағынуы қажет.
Осы жағдайдар жөнінде Құран Кәрімнің «Ахзаб» сүресінің 58-аятында: «Сондай мүмін ер, мүмін әйелдерді жазықсыз кейіткендер, әрине олар; жала жауып, ашық күнә жүктеп алды» деп айтылған. Ал Пайғамбарымыз (оған Алланың салауаты мен сәлемі болсын): «Мұсылман басқа бір мұсылманға, тілімен, қолымен зиян келтірмеген» деп бұйырды. (Муслим)
Ендеше, Құран Кәрімде бағдаршамның аты айтылмаса да, қажеттілігі айтылғанын көреміз. Алла Тағала баршамызды біреуге қолымен, тілімен зиян тигізуші болудан сақтасын!
Қуат ҚАБДОЛДА
