Солақай адамға оң қолмен тамақ жеу міндетті ме?

Сұрақ: Солақай адамға оң қолмен тамақ жеу міндетті ме?

Жауап: Мамандардың айтуынша, әлемде шамамен адамның 10% солақай екен. Солақайлық медицинада бір анатомиялық ауытқу болып саналмайды. Әдетте солақайлар туылғанынан бастап оң қолына қарағанда сол қолымен белсендік танытып дағдыланған немесе бала кезінде оң қолындағы жарақат, т.б. себептерге байланысты сол қолымен әрекет етіп әдеттенген болып келеді.

Исламда оң қолмен ішіп-жеу – сүннет. Ибн Омардан (оған Алла разы болсын) келген хадисте пайғамбар (оған Алланың салауаты мен сәлемі болсын): «Кімде-кім тамақ жесе, оны оң қолымен жесін. Су ішсе, оң қолымен ішсін. Өйткені шайтан сол қолымен жейді жіне сол қолымен ішеді», – деген (Мүслим). Келесі бір хадисінде Омар ибн Әбу Сәләмаға (оған Алла разы болсын): «Балақай, тамақ жегенде Алланың атымен баста, оң қолыңмен және алдыңнан же», – деп айтқан.

Ислам ешкімге шамасынан тыс нәрсе жүктемейді. Оң қолмен жеу – сүннет. Егер оң қолда жарақат, мүгедектік сияқты үзірлі жағдайлар болса, онда ол сол қолымен жей береді. Ал енді үзірі жоқ бірақ: «Мен сол қолмен жеп дағдыланған едім» деушілер болса, онда сауап алу үшін аздап еңбек еткен жөн. Себебі Құдай Тағала әркімге еңбек етіп төккен маңдай теріне сәйкес сауап береді.