6 шілде – елорда күніне орай 100-ден астам мәдени, спорттық және танымдық іс-шара өтеді, деп хабарлайды ҚазАқпарат тілшісі.
«Маусым-шілде айлары аралығында қала күнін мерекелеуге Астана қаласы Мәдениет басқармасына қарасты 12 мекеменің күшімен 100-ден астам іс-шара жоспарланып отыр. Бүгінде оның кейбірі басталып та кетті», – деді Астана қаласы ішкі саясат басқармасының басшысы Дәурен Бабамұратов қалалық коммуникациялар қызметі алаңында өткен брифингте.
Елорда күніне орай өтетін іс-шаралар:
30 маусым «Жастар» театрында «Таптым. Ғашық болдым. Жоғалттым» мюзиклі және 1-2 шілде Музыкалық жас көрермен театрының халықтың ыстық ықыласына бөленген «Гауһартас» музыкалық драмасы қойылады.
1 шілде Амфитеатрда «Аялаған Астана» өнерлі жас әншілерді тәрбиелеуге арналған музыкалық байқаудың гала-концерті.
2 шілде Домбыра күні. ЭКСПО алаңында көпшілікке «Домбыра дастан» шоу-концерті ұсынылады.
2 және 3 шілдеде «Қаламгерлер» аллеясы мен №5 балалар кітапханасында Қазақстан жазушылар одағымен бірге «Астана – шабыт арқауы» ақын-жазушылармен кездесулер циклі өтеді.
3 шілде Бейбітшілік және келісім сарайында «Алтын мұра» Қазақстанның ең үздік дәстүрлі әнші, күйші, жыршыларының мерекелік концерті өтеді.
4 шілде «Астана» концерт залында «Әзіл әлемі» музыкалық әзіл-ысқақ кеші өтеді.
4 шілде «Жастар» сарайында Астана қаласы Мәдениет басқармасына қарасты «НАЗ» мемлекеттік би театрының «ҚАЗАҚ ЖӘДІГЕРЛЕРІ» концерттік бағдарламасы ұсынылады.
5 шілде Амфитеатрда халық арасында танымал әртүрлі аспапта орындаушылардың «Елорда әуені» шоу-концерті өтеді.
5-6 шілде ЭКСПО алаңында балалар мен ересектерге арналған «Гүл Астана» ЭКО фестивалі өтеді.
5-6 шілде «Гүл шахары – Астана» республикалық суретшілер плэнері жоспарланған.
5-6 шілде Әзірбайжан Мәмбетов атындағы мемлекеттік драма және комедия театрында «Болмаған балалық шақ» драмасы ұсынылады.
5, 6, 8 шілде Музыкалық жас көрермен театры «Қыз-Жібек» этно-фольклорлық мюзиклі премьерасын ұсынады.
6 шілде қаланың шет аймағындағы тұрғын үй алаптарында «Думанды Астана» концерттері өтеді.
6 шілде ЭКСПО алаңында OPEN AIR ашық аспан астындағы мерекелік концерт өтеді.
6-8 шілде Орталық саябақта отбасылық демалысқа арналған MEREKE STREET фестивалі өтеді.
7 шілде «KITAP FEST» республикалық кітап көрмесі.
8-9 шілде көше тағамдарының фестивалі өтеді.
