Менің намазым – шүкірлігімнің көрінісі: ең ардақты жаратылыс болып жаралғаным үшін; он екі мүшем бүтін, денім сау болғаны үшін; ата-анамның махаббаты мен қамқорлығына бөленгенім үшін; жар құшып, ұрпақ сүйгенім үшін; азат Елде, азаттықта өмір сүріп жатқаным үшін; Бар болуға, сезінуге, із қалдыруға мүмкіндік бергені үшін; ең бастысы иман нығметімен қауышқаным үшін – мен байыптай алған алған бүкіл жақсылық-нығметтерге және мен білмейтін, бағаламай жүрген барша нығметтерге айтқан алғысым!
Менің намазым – жүктелген парызды атқарғаным: аса Қамқор, ерекше Мейірімді Иемнің менің пайдам үшін бұйырған үкіміне құрметпен, кішіпейілдікпен жауап қайтаруым!
Менің намазым – тәлімгерім: тұрақтылық пен сабырға, ес жию мен сергектікке тәрбиелейтін; өмір сүру барысында кездесетін адамшылық міндеттерімді адал атқаруға үйрететін мектебім; ғұмырымның жүйелі жүруі мен реттілігінің қазығы!
Менің намазым – иманымның азығы: жүрегімді – ішкі хәлімді қалыптастырушы, Жаратушыммен байланыстырушы, Ұлы Раббымның құзыры мен назарында екенімді сезіндіруші ғибадатым!
Менің намазым – тазалығымның кепілі: пенделігім мен әлсіздігімді мойындау мен тәубе арқылы қателік-күнәлардан арылуымның көрінісі; Сенімдегі күмәнсіздіктің, жүректегі байламның, денедегі тазалық пен киімдегі әдептің көрінісі!
Менің намазым – иманымның дәлелі: Бір және Барға деген шексіз сенімім мен тәуекелімнің, Әлімсақтағы Уәдеге беріктігімнің, сынаққа сабырымның, нығметтерге шүкірлігімнің белгісі!
Менің намазым – Алла елшісінің Сүннетіне ергенімнің дәлелі: ардақты Пайғамбарымызға (Ол кісіге Алланың игілігі мен сәлемі болсын!) деген шексіз құрмет-ізетім!
Менің намазым – ниетімнің айнасы: мені ардақтап жаратқан Махаббат Иесінің ғажап сүйіспеншілігіне қайтарған болымсыз алғыс-сүйіспеншілігім, шүкірлік-махаббатым!..
Алғадай ӘБІЛҒАЗЫҰЛЫ
