Құдси хадистердің бірінде ардақты Пайғамбарымыз (оған Алланың игілігі мен сәлемі болсын) былай дейді: «Қиямет күні Алла Тағала:
– «Ей, пендем! Сенен, мені тамақтандыруыңды сұрадым. Сен мені тамақтандырмадың», – дейді. Сонда адам баласы:
– «Сен әлемдердің Раббысысың, мен Сені қалай тамақтандырамын?» – дейді. Алла Тағала:
– «Пәленше деген пендем, сенен тамақ сұраған еді. Егер оған тамақ берсең, бергеніңнің сауабын менің құзырымда міндетті түрде алар едің. Мұны білмеуші ме едің?» – дейді. Алла Тағала тағы да:
– «Ей, пендем! Мен сенен су сұраған едім. Сен су бермедің», – дейді. Адам баласы:
– «Сен әлемдердің Раббысысың, мен Саған қалай су беремін?» – дейді. Алла Тағала:
– «Пәленше деген пендем, сенен су сұраған еді. Сен бермедің. Егер оның сұрағанын бергенде, бергеніңнің сауабын менің құзырымда алар едің. Мұны білмеуші ме едің?» – дейді» (Мүслим).
Демек, Алланың қалауы аш қалған жандарды тойғызумен ұштасады екен. Хақ Тағала осындай маңызы бар қоғамдық қызметті іске асырған ықыласты пенделерін былай деп мадақтайды: «(Олар) өздерінің тәбеті, мұқтаждығы бола тұра, қолындағы тамағын пақырға, жетімге, тұтқынға береді. (Олар) күмәнсіз: Сендерді тек Алла разылығы үшін тамақтандырамыз! Сендерден ешқандай төлеу (ақы) немесе алғыс күтпейміз!». Біз бәлелі, машақатты күнде Раббымыздың (қаһарына ұшыраудан) қорқамыз!», – дейді. Сондықтан Алла Тағала оларды сол күннің жамандығынан сақтап, жүздеріне нұрмен қуаныш ұялатады» (Инсан сүресі, 8-11 аяттар).
Кез келген мұсылман кісі қолынан келгенше аш болған жандарды тойғызуға, сусыз қалған жандардың шөлін қандыруға күш салуы керек-ақ. Өзімен ғана шектеліп қалмай, өзге де момындарды осындай игі істердің жүзеге асырылуына жәрдем етуге шақыруы керек.
Дайындаған – Тұрар ТҮГЕЛҰЛЫ
