Сұрақ: Дауыстап күлуге қатысты шариғат не дейді?
Жауап: Мұсылман – басқалар үшін үлгі болар жан. Ол айналадағы адамдар бұрылып қарайтындай немесе олардың назарын аударатын дәрежеде қатты дауыспен күлмейді. Кейбір адамдардың дауыстап күлгені сонша дауысы алыстағы адамға естіледі. Мұндай күлкі көршілес адамдардың мазасын алуы мүмкін. Ол жерде тыныштықты қажет ететін науқас немесе демалып жатқан жасы үлкен қария, сәбидің болуы да мүмкін ғой. Осындай жағдайды ескерген ислам шектен тыс дауыстап күлуді қош көрмейді.
Айша анамыз (р.а.): «Алла елшісінің аузын ашып, кіші тілі көрінгенше күлгенін ешқашан көрмедім. Ол тек күлімсірейтін еді», – деп айтқан (Бұһари).
Хафиз ибн Хажар бұл хадисті: «Яғни Алла елшісінің (с.ғ.с.) күлкіге толықтай батып күлгенін көрмедім», – деп түсіндірген. Сондықтан да ислам адамды әрқашан әдеп талаптарын сақтауға шақырады.
Жалғас САДУАХАСҰЛЫ
