Сұрақ: Ұстаған оразам ақыретте маған шапағатшы бола ала ма?
Жауап: Мұсылманның бұл өмірде жасаған құлшылығы, тұтқан оразасы мен намазы, берген садақасы мен жасаған қажылығы – ақырет үшін. Кез келген адам қайыр садақа бергенде немесе біреуге ізгілік жасағанда «Құдайдан қайтады» деген оймен жасайды.
Сондай-ақ, халық арасында: «Жасаған жақсылығың алдыңнан шығады» деген пікір де кең тараған. Бұл пайымдардың шығуы жайдан жай емес. Демек, бұлардың астарында бір негіз бар.
Расында да Қиямет күнінде мұсылманның бұл өмірде жасаған жақсылығы өзіне қайтады. Мысалы, оның тұтқан оразасы мен оқыған Құраны шапағатшы болып келеді екен. Бұл туралы Алланың елшісі (с.ғ.с.) былай деп айтқан: «Қиямет күні Раббының алдында ораза мен Құран пенде үшін шапағатшы болады. Ораза келіп:
– Раббым! Мен оны күндіз ішуден және жеуден тыйған едім. Енді мен оған шапағатшы болайын, – дейді. Құран келіп:
– Раббым! Мен оны түндерде ұйқысынан айырдым. Сол үшін оған шапағат етейін, – дейді. Алла ол екеуіне шапағат етулеріне рұқсат береді. Олар шапағат қылады» (Имам Ахмед).
Жалғас САДУАХАСҰЛЫ
