Бүгін Маңғыстау облысы дін істері басқармасы мен «Бекет-Ата» орталық мешіті «Қош келдің Әз наурыз» атты шара ұйымдастырды.
Орталық «Бекет-Ата» мешітінде өткен іс-шараға 50-ге жуық әйел жамағаты қатысып, асыл аналарымыз қойылым, ұршық иіру және сұрақ-жауап түрлерінен сайыс өткізіп, бақтарын сынады.
Наурызға қатысты ел ішінде әртүрлі пікір, ой тудырып, қисынсыз әңгіме таратушылар баршылық. Кейбір шала діни сауаттылар бұл мейрамның ежелгі отқа табынушылардың діни рәсімі, исламға қарсы деп пайымдап жатады. Шын мәнінде солай ма?
Кез келген салт немесе дәстүр халықтың діни ұстанымдарына қарай бейімделеді. Наурыздың қазіргі бет-бейнесі біздің салтымыз бен діни құндылықтарымызға әбден сіңіскен деуге болады. Бүгінде наурыз мейрамы діни ерекшеліктерін жоғалтып, отқа табынушылық дінінің элементтерінен ада, халық арасында тек дәстүр ретінде қалыптасқан.
Оған дәлел: мұсылман тіршілігіне қатысты сан алуан салалардағы іс-әрекеттердің заңдылық сипатын анықтайтын фиқһ ілімінің негіздерінде «Әдет-ғұрып – төреші», яғни нақты дәлелдер келмеген кейбір мәселелерде адамдар арасында қалыптасқан әдет-ғұрыпқа жүгініп, солардың негізінде үкім шығарылады деген заңнамалық қағида.
Наурыз мерекесін тойлау шариғатқа қайшы емес, оны бұзылған діни сенімдерге байланыстыруға да ешқандай негіз жоқ, керісінше осындай салт-дәстүрлеріміз арқылы халқымыздың ынтымақ-бірлігі күшейеді, туыстық, достық қарым-қатынастар нығаяды, сүйіспеншіліктері артады.
Әйел жамағаты арасынан бес әже сайысқа түсті. Олар 4 түрлі өнерден «таныстыру, ұршық иіру, көрініс, сұрақ-жауап» бойынша бақтарын сынады. Нәтижесінде жүлделі орындар төмендегідей бөлінді:
1-орын: Худибаева Бибігүл Ілесқызы;
2-орын: Халымбетова Зәуреш Худайбергенқызы;
3-орын: Болатова Жамиға Каринқызы:
4-орын: Бақтыбаева Ақерке.
Ынталандыру сыйлығын Сариева Асем иеленді. Сайысқа қатысып бақтарын сынаған асыл аналарымызға қазылар алқасының шешімі бойынша орындар анықталып, сыйлықтар табыс етілді.
