Вандализм шариғатта күнәға жата ма?

Сұрақ: Вандализм шариғатта күнәға жата ма?

Жауап: Уикипедия – ашық энциклопедиясынан алынған мәліметке сәйкес, Вандализм мәдени-тарихи ескерткіштерді, басқа да рухани мәдениет құндылықтарды, қоғамдық орындардағы мүліктерді аяусыз, қасақана жою, қиратып бүлдіру, тып-типыл тонау әрекеті. Әдетте ол жабайылық пен зұлымдықтың шектен шыққан бір түрі есептеледі. Бұл да бұзақылықтың бір түрі болып табылатыны сөзсіз. Сонымен қатар, зорлық көрсету, қорқытып-үркіту, қол жұмсап ұрып соғу, сол сияқты өзгенің мүлкін жойып жіберу не бүлдіру, не аса қатыгездікпен бейбастақ әрекеттер жасау да бұзақылыққа жатады.

Алла Тағала Құран Кәрімде: «Оларға: «Жер жүзінде бұзақылық қылмаңдар!»,- делінсе, олар: «Біздер ғана түзеуші» дейді. Сақ болыңдар! Шын мәнінде олардың өздері бұзақы, алайда олар түсінбейді» – деп, бұйырады. (Бақара сүресі, 11-12 аят).

Мұхаммед пайғамбардың ардақты сахабалары өздеріне Мұхаммедтің (с.ғ.с.) «Соғыста балаларды, қарттарды жəне əйелдерді өлтірмеңдер, құрма ағаштарын, егістіктерді, жеміс беретін ешбір ағашты қиратпаңдар, өтірілгендердің ағзаларын кеспеңдер» – деп, бұйырғанын жеткізеді.

Исламның басқа дін өкілдеріне қатысты ұстанымы да нақты белгілі. Ислам діні адамның жанын, малын, дінін ұстануына кепілдік береді. Мысалы, Омаядтар және Аббасилердің қосындарында әскер болған түрік-иран халықтарының өз дінін ұстануына рұқсат етілген. Бұған дәлел ретінде қолбасы Афшинның бұтын (пұт) өзімен ала жүрген көрсетіледі. Көріп отырғанымыздай ислам дінінде зорлық-зомбылыққа мулдем орын жоқ.

Шариғат тілімен айтар болсақ вандализм күнәға жатады.

Балғабек МЫРЗАЕВ