Нұр-Мүбарак университетінің “дінтану” мамандығы бойынша 4 курс студенті Жайдарбек Төреханов Әлемдік және дәстүрлі діндер көшбасшыларының VII съезінің дайындық шаралары мен өткізу барысында белсенділігі үшін арнайы алғысқа ие болды.
Қазақстан Республикасы Парламенті Сенатының Аппарат басшысы Әлия Рақышеваның қолы қойылған алғысты Нұр-Мүбарак университетінің ректоры, профессор Мұхаммад аш-Шаххат әл-Жинди табыс етті. Жайдарбек Мақсатұлының оқуда озат әрі белсенділігін жоғары бағалаған ректор, оған әрдайым сәттілікте болуын тіледі.
Республикалық дінтанушылар олимпиадасында I орын иеленген университетіміздің «D-STUD» дінтанушылар клубының белсендісі Жайдарбек Мақсатұлы Әлемдік және дәстүрлі діндер көшбасшыларының VII съезінде ұйымдастырушылар тарапынан бекітілген лиазон офицері қызметін атқарған. Египет Араб Республикасынан келген Ахмад ат-Тойб делегациясымен бірге Тәжікстан Бас мүфтиін қарсы алу және 14-15 қыркүйекте съезд күндерінде қызмет көрсету шаралары жүктелген.
Осылайша міндетін қалтқысыз атқарған Нұр-Мүбарак университетінің болашақ түлегі Жайдарбек Төрехановқа арнайы Алғыс жарияланды.
Нұр-Мүбарак университетінің баспасөз қызметі
